Arakan Yoma |
မြောက်ဦးဒေသကို ကမ္ဘာ့ယဉ်ကျေးမှုအမွေအနှစ် (UNESCO) စာရင်းဝင်နိုင်ရေးအတွက် လာဖို့ စက်တင်ဘာလက စလို့ အဆိုပြုမူကြမ်းလွှာ တင်သွင်းဖို့လို့ ရှေးဟောင်းသုတေသနနဲ့ အမျိုးသားပြတိုက် ဦးစီးဌာန မြောက်ဦးဌာနခွဲ ညွှန်ကြားရေးမှူး ဦးစိုးစိုးလင်းက ပြောပါရေ။
မြောက်ဦး ရှေးဟောင်းယဉ်ကျေးမှု ထိန်းသိမ်းစောင့်ရှောက်ရေး အဖွဲ့က ပီးပို့လာရေ မူကြမ်းကို ရှေးသုဌာန အနေနဲ့ ရုံးပိုင်းဆိုင်ရာ လိုအပ်ချက်တိ ဖြည့်စွက်လို့ ရှိနီပါရေ။ မူကြမ်းကို ပီးပို့ပြီးရေနောက် အချောသတ်လွှာကို ၂၀၂၂ ဇွန်နဝါရီလမှာ ပီးပို့ ရဖို့ပါ။
ယင်းနောက် ယူနက်စ်ကို တာဝန်ရှိသူတိ အနေနဲ့ တရားဝင် အကြောင်းကြားလို့ဖြစ်စီ၊ ရှောင်တခင်ဖြစ်စီ လာရောက် စစ်ဆီးဖို့ဖြစ်ပြီးကေ ကမ္ဘာ့ယဉ်ကျေးမှု အမွေအနှစ် အဖြစ် သတ်မှတ်နိုင်မှု ရှိ၊ မရှိကိုတော့ ၂၀၂၃ ခုနှစ်မှာ ကြေညာဖို့ ဖြစ်ပါရေ။
ပြီးခရေ တစ်နှစ်အတွင်းမှာ ဆိုကေ မြောက်ဦးဒေသက ယဉ်ကျေးမှု အမွေအနှစ်တချို့ ဖျက်ဆီး ခံခရပနာ လက်ရှိမှာ ဆိုကေ ယဉ်ကျေးမှုဇုန်အတွင်း ကျူးကျော်ဝင်ရောက်ပြီးကေ ဘုန်းကြီးကျောင်းနဲ့ နီအိမ်တိ ဆောက်လုပ်စွာ၊ တောင်တိကို ဘတ်ဟိုးကားကြီးတိနဲ့ ဖျက်ဆီးကတ်စွာတိ ရှိရေလို့ သိရပါရေ။
ဒေလုပ်ရပ်တိစွာ ယူနက်စ်ကို စာရင်းဝင်ရေးကို အဟန့်အတား ဖြစ်စီရုံမက သမိုင်းဝင် ယဉ်ကျေးမှုတိကိုပါ ဖျက်စီး နီစွာလို့ မြောက်ဦး ရှေးဟောင်းယဉ်ကျေးမှု ထိန်းသိမ်းစောင့်ရှောက်ရေး အဖွဲ့ ဥက္ကဌ ဒေါ်ခင်သန်းက ပြောပါရေ။
ဌာနဆိုင်ရာ ဖက်ကတော့ ဒေချင့်ကို အာဏာပိုင်တိဖက်ကရာမက ဒေသခံတိကပါ ပူးပေါင်းဆောင်ရွက်မှ ရနိုင်ဖို့လို့ ပြောပါရေ။
589 total views, 2 views today